સ્વર અક્ષર

અંતરના પાને હળવેથી અંકાયા સ્વર અક્ષર,
સૂર-શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર…

વતન તણી માટીની ફોરમ ભીંજવી દેતી ભીતર;
ફૂલ-ફૂલની ઓળખ લઈને ખુશ્બૂ વહેતી ઘર-ઘર;
સમય ભલેને સરી જાય પણ અમર રહે સ્વર અક્ષર;
સૂર શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર…

એક જ નાની ફૂંક વહે ને એક બંસરી વાગે;
એક જ પીંછી રંગ ભરે ને દૃશ્ય સજીવન લાગે;
કંઠ એક જો બને પૂજારી ગીત બને પરમેશ્વર;
સૂર શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર…

-શ્યામલ મુન્શી